Húsavíkurkirkja

Hjálparstarfið hefur samstarf við fjölmarga aðila sem bæði miðla styrkjum innanlands í gegnum Hjálparstarfið og þiggja styrk frá stofnuninni. Þess nýtur fólk um land allt og á öllum aldri þ.e. bæði barnafjölskyldur, einstaklingar og ellilífeyrisþegar.

Velferðasjóður íslenskra barna hefur veitt styrki í gegnum Hjálparstarf kirkjunnar undan farið ár sem ætlaðir eru börnum utan Reykjavíkur. Þessar gjafir vekja mikla gleði og ánægju, hvort sem börnin velja að fara í sumarbúðir, á fótboltamót, að kaupa hjól, línuskauta eða fara á reiðnámskeið. Á haustin úthlutar Hjálparstarfið einnig styrkjum frá Velferðasjóðnum. Þeir eru til foreldra vegna útgjalda í skólabyrjun. Áhersla er á ungmenni á aldrinum 16-18 ára sem þurfa að greiða skólagjöld og bókakostnað. Sorpa hefur einnig gefið til þessa málefnis fjármuni og stutt aðra skjólstæðinga með afsláttarkjörum í verslun sinni Góða hirðinum. Fólk er beðið um að leita til sinna sóknarpresta varðandi umsóknir í þessum efnum.

Kirkjukór Húsavíkur heldur til Kanada í lok júlí ásamt fríðu föruneyti og tekur þátt í íslendingadeginum í Gimli í byrjun ágúst. Flogið verður til Minneapolis. Síðan verður ferðast um íslendingaslóðir í Minnesota og Kanada undir handleiðslu vestur íslensks fararstjóra. Farið er í þessa ferð í tilefni af aldarafmæli kirkjunnar. Kórinn hefur að undanförnu verið að æfa íslensk lög og þjóðsöngva Kanada og Bandaríkjanna sem sungnir verða í ferðalaginu. Mikil tilhlökkun ríkir í hópnum. Kórfélagar, makar og aðrir gestir halda síðan heim á leið 10 ágúst.

Ragnar Þór Kjartansson Garðarsbraut 35 a er látinn. Útför hans fer fram frá Húsavíkurkirkju laugardaginn 30. júní kl. 14.

Jakob Gunnar Sigurðsson var skírður að Skálabrekku 7. á þjóðhátíðardaginn 17. júní. Foreldrar hans eru Halla Björg Albertsdóttir og Sigurður Valdimar Olgeirsson. Skírnarvottar: Einar Örn Arnarson og Guðrún Gunnarsdóttir.

Þuríður Hermannsdóttir lést á Akureyri 12. júní. Hún verður jarðsungin n.k. miðvikudag frá Húsavíkurkirkju kl. 14.

Kjartan Gauti Róbertsson var skírður laugardaginn 9. júní að heimili sínu. Foreldrar hans eru Selma Kristjánsdóttir og Róbert Gíslason, Miðgarði 1, Húsavík. Skírnarvottar: Hildur Kristjánsdóttir og Salvör Rafnsdóttir

Við höfum sannarlega ástæðu til þess að fagna og vera glöð að afloknum hátíðarhöldum í tilefni aldarafmælis Húsavíkurkirkju. Stórbrotnir listamenn, styrkþegar Friðrikssjóðs lögðu sitt á vogarskálina til að gera hátíðina ógleymanlega þeim sem hana sóttu með frábærum tónlistarflutningi sínum og skemmtilegu viðmóti. Friðrikssjóður hefur svo sannarlega sannað gildi sitt. Það var haft á orði hversu skýrmæltir fyrrum þjónandi prestar voru er þeir lásu ritningarlestrana í afmælismessunni og að ungir prestar gætu mikið af þeim lært. Kórar kirkjunnar vöktu athygli fyrir fallegan söng, Sigurjón Jóhannesson fyrir mjög áhugavert erindi um sögu kirkjunnar. Kirkjusögusýningin í Safnahúsinu kitlar skynfærin, myndirnar og textarnir vekja forvitni lesandans. Gamla skírnarskálin með rendum tréfæti úr gömlu kirkjunni vekur athygli, áletraða spjaldið sem var þar yfir kórdyrum einnig. Vert er að vekja athygli á því að sýningin stendur yfir í Safnahúsinu til 17. júní. Hátíðarkvöldverðurinn var ógleymanlegur þeim boðsgestum sem hann sóttu. Kirkjunni voru gefnar margar góðar gjafir sem síðar verður greint frá en sóknarprestur gerði grein fyrir þeim og bað góðan Guð að blessa glaða gefendur.Forseti Íslands, Ólafur Ragnar Grímsson flutti ávarp í kvöldverðarboðinu þar sem hann fyrir hönd íslensku þjóðarinnar þakkaði húsvíkingum fyrir að hafa gætt þjóðardýrgripsins, Húsavíkurkirkju í heila öld. Það kom mér skemmtilega á óvart í messu sjómannadagsins að sjá þar kunnugleg andlit frá Þýskalandi. Þar sátu á kirkjubekk þýsku hjónin sem ég gaf saman í hjónaband í fyrrasumar og viðtal var tekið við sem birtist í Skarpi. Ég gaf mig á tal við þau. Í ljós kom að þau komu gagngert til Húsavíkur frá Þýskalandi til þess að taka þátt í hátíðarhöldunum! Og þau áttu ekki orð yfir menningarlegri og trúarlegri reisn þessarar afmælishátíðar!

Það ætti ekki að hafa farið framhjá sóknarbörnum að aldarafmælis Húsavíkurkirkju verður minnst um helgina með veglegum hætti. Afmælisnefndin hefur verið vakin og sofin í þágu verkefnisins undanfarna mánuði. Formaður nefndarinnar er Helga Jónína Stefánsdóttir, meðstjórnendur auk sóknarprests eru Hreiðar Karlsson, Björn G. Jónsson og Frímann Sveinsson.Afraksturinnn er glæsileg dagskrá þar sem flestir eiga að finna eitthvað við sitt hæfi. Afmælisnefndin hvetur fólk að láta dagskrána ekki framhjá sér fara og taka með sér gesti, Við viljum sérstaklega vekja athygli á tónleikunum á föstudagskvöldið kl.20, hátíðarmessunni á laugardag kl. 14 og opnun kirkjusögusýningarinnar sama dag kl. 16 í Safnahúsinu en undirbúningur hennar hefur verið í höndum Guðna Halldórssonar, Sigurjóns Jóhannessonar og Péturs Jónassonar.Messan verður einstakur sögulegur viðburður því að þar munu þjóna fyrrverandi prestar við kirkjuna auk sóknarprests og vígslubiskups á Hólum sem mun prédika. Umgjörðin er einstök og fögur listasmíð, Húsavíkurkirkja sem ber höfundi sínum Rögnvaldi Ólafssyni fagurt vitni, reist Guð til dýrðar og vígð 2. júní 1907. Sóknarbörn eru stolt af kirkjunni sinni og hafa auðsýnt henni ræktarsemi og sóma í tilefni afmælisins eins og svo oft áður. Fyrir Prestastefnuna lagði ég inn gott orð til himnaföðurins og bað um gott veður. Ég var þá bænheyrður. Ég sé ekki betur en að ég verði bænheyrður aftur vegna afmælishátíðarinnar. Ég hef aldrei verið talinn mjög bænheitur maður. Öðru vísi mér áður brá. Sóknarbörn, til hamingju með afmælið. /sk

Valdís Birna Daníelsdóttir var skírð 27. maí. Foreldrar hennar eru Árný Björnsdóttir og Daníel Jónsson, Stórhóli 3. Skírnarvottar: Reynir Björnsson og Lilja Jóhannesdóttir.

Hekla Lovísa Sveinsdóttir var skírð 25.maí. Foreldrar hennar eru Kristjana S. Benediktsdóttir og Sveinn Bjarnason, Brúnagerði 8. Skínarvottar: Sólveig Jóna Skúladóttir og Guðrún Guðbjartsdóttir.