Húsavíkurkirkja

Látin er Sigríður Vigdís Böðvarsdóttir. Hún lést á Skógarbrekku, sjúkrahúsi Húsavíkur fimmtudaginn 30.apríl. Útför hennar mun fara fram frá Húsavíkurkirkju laugardaginn 9.maí kl. 14.00. Vegna aðstæðna í samfélaginu verða aðeins nánustu aðstandendur viðstaddir, en streymt verður frá athöfninni  á fésbókarsíðu Húsavíkurkirkju.

Varðandi útfarir frá Húsavíkurkirkju meðan á samkomubanni stendur.

Kæru sóknarbörn og vinir.

Nú er samkomubann á Íslandi. Kirkjulegar athafnir eru meðal þess sem bannið nær til. Útfarir mega því aðeins fara fram með ákveðnum skilyrðum. Annars vegar felast þau í því að fjöldi viðstaddra er takmarkaður en hins vegar verða að vera tveir metrar hið minnsta á milli kirkjugesta.

Vegna þessa banns verður fyrirkomulag útfara í Húsavíkurkirkju með þessum hætti á meðan bannið er í gildi:

1)     Útfarir verða ekki opnar almenningi og fylgjum við fyrirmælum um fjölda kirkjugesta sem ekki verða fleiri en 20 við hverja athöfn, með fyrirvara um breytingar.

2)     Æskilegt er að allar kistulagningar fari fram í kirkjunni.

3)     Fjölskyldur af sama heimili mega sitja saman.

4) Mögulegt er fyrir aðstandendur að streyma útför ástvinar á netinu og undirbúa það í samráði við settan sóknarprest.

Þetta eru undarlegir tímar sem við göngum nú inn í.

Þegar ástvinur deyr og sorgin knýr dyra, finnst mörgum hjálplegt að hvíla í þeim hefðum og athöfnum sem við höfum og tengd eru kveðjuathöfnum eins og kistulagningu og útför.

Séra Guðbjörg Arnardóttir prestur á Selfossi kemst vel að orði í grein sinni Að kveðja á tímum Covid 19, en þar  skrifar hún m.a. : ,,Athafnir og hefðir tengdar því að kveðja, höfum við lengi átt og eiga að stuðla að því að hjálpa til við það sorgarferli, sem fer í gang þegar ástvinur fellur frá.  Að kveðja fallega, í þakklæti og af virðingu er mikil hjálp í sorgarferlinu.  Að standa við kistu ástvinar, signa yfir, kyssa, strjúka vanga, segja takk fyrir allt og allt, fella tár og fallast í faðma, er þungbært, en í þeirri stund eru ljós huggunar og vonar.  Að heyra huggunarrík og falleg orð, að rifja upp æviferil og minningar, að hlusta á tónlist og sálma sem veita huggun eða kveikja á minningum er styrkur á vegi sorgarinnar.  Að hittast yfir kaffibolla eftir kveðjustund, fá faðmlag, fá hlýtt og traust handartak með fallegum orðum, er stuðningur og styrkur við það ferli sem framundan er.  Ferlið felst í að byggja upp nýtt og annars konar líf í ljósi þess að hafa misst.  Allt þetta eru leiðarsteinar í átt  til vonarinnar um endurfundi, eilíft líf í faðmi Guðs og í átt til þess að geta aftur brosað, fundið gleði og tilgang. 

Á þeim tímum sem við erum að ganga í gegnum núna verðum við að kveðja á annan og öðruvísi hátt en við erum vön.  Hvort sem andlát ástvinar okkar hefur borið að vegna veirunnar eða á annan hátt, getum við næstu vikur ekki kvatt eins og við erum vön. Ekki kvatt með þeim aðferðum sem við kunnum og vitum að hafa reynst okkur og kynslóðunum á undan hjálplegar í sorgarferlinu.  Inn í kveðjustundina blandast það að við höfum kannski ekki getað heimsótt eða átt innilegar samverustundir með ástvini okkar eins oft og við höfum getað fram að þessu.  Við höfum jafnvel ekki getað verið til staðar í veikindum eins og við hefðum annars gert.  Það er svo margt í kveðjustundinni sem við missum af og það er margt sem vantar.  En aðstæðunum eins og þær eru um þessar mundir breytum við ekki, heldur þurfum að laga okkur að þeim.”

Settur sóknarprestur og annað starfsfólk Húsavíkurkirkju munu gera allt sem á þeirra valdi stendur til að gera fólki kleift að kveðja ástvini fallega og aðstoða þá til að stundin verði sem innihaldríkust og uppbyggileg.  En um leið ber okkur öllum skylda til að fara í öllu að fyrirmælum almannavarna. Nú er brýnt að við förum varlega, sýnum hvert öðru umhyggju og tillitssemi og styðjum hvert annað með góðum orðum og nærveru, þó snerting, hlý faðmlög og þétt handtak verði að bíða enn um sinn. Það má síðan kannski vel hugsa sér, að þegar hættan af Covid 19 verður gengin yfir og samkomubanni aflétt, sólin farin að skína og grasið að grænka, þá komi fjölskyldur saman, eigi góða dagstund þar sem rifja má upp minningar, segja sögur, gleðjast og umvefja hvert annað í þakklæti og von.

Látinn er Halldór Þorvaldsson, hann lést föstudaginn 20.mars á Heilbrigðisstofnun Þingeyinga.

Útförin fer fram í kyrrþey, þ.e. aðeins 20 manns úr hópi nánustu aðstandenda geta verið viðstaddir athöfnina í kirkjunni vegna samkomubannsins. En hægt verður að fylgjast með athöfninni á netinu og er öllum velkomið að hafa samband við Katrínu Kristjánsdóttur í síma 848 5822 til að fá upplýsingar og aðgang að fésbókarsíðu fjölskyldunnar þar sem athöfninni verður streymt.

Sigrún Steiney Sigurðardóttir var skírð í Húsavíkurkirkju, laugardaginn 14.mars.

Foreldrar hennar eru Ragnheiður Ingibjörg Einarsdóttir og Sigurður Valdimar Olgeirsson.

Skírnarvottar eru: Sæþór Olgeirsson, Bjarnrún Kristjana Haraldsdóttir og Júlíana Haraldsdóttir.

Þann 23. febrúar var Sóldís Nanna Einarsdóttir skírð. Foreldrar hennar eru Ásta Gísladóttir og Einar Örn Kristjánsson.

Skírnarvottar eru Gísli Sigurðsson og Kristján Stefánsson. Skírt var í Einarsstaðakirkju í Reykjadal.

Útför Báru Hermannsdóttur frá Flatey á Skjálfanda fór fram í kyrrþey frá Húsavíkurkirkju laugardaginn 14. mars. klukkan 14.00.

Í ljósi samkomubannsins sem stjórnvöld hafa sett á og tekur gildi aðfararnótt mánudagsins 16. mars eru hér mikilvægar tilkynningar varðandi safnaðarstarfið í Húsavíkurkirkju
1. Mottumars- messa sem vera átti þann 22.mars fellur niður
2. Sunnudagaskólinn er kominn í ótímabundið hlé.
3. Engar helgistundir verða á Dvalarheimilinu Hvammi á meðan samkomubannið er í gildi.
4. Fermingarathafnir sem vera áttu Pálmasunnudag (5. Apríl) og Skírdag ( 9.apríl) falla niður. Stefnt er að því að fermingarathöfnin á Hvítasunnu fari fram, enda verði þá búið að aflétta samkomubanni, gangi fyrirætlanir yfirvalda eftir. Verði bannið framlengt getur fólk valið sér annan dag. Mögulegt er nú að bæta við fleiri fermingarbörnum á Hvítasunnu. Verið er að vinna að því að bjóða upp á aðra daga í sumar. Tölvupóstur mun berast svo fljótt sem þau mál skýrast.
5. Fólki er ráðlagt að fresta skírnum og hjónavígslum en þær sem fara fram á meðan samkomubann gildir verða með þeim takmörkunum sem af því hlýst.
6. Útfarir geta farið fram frá kirkjunni en þeim verður að haga í samræmi við ákvæði samkomubannsins.
7. Settur sóknarprestur, er til viðtals á þriðjudögum – föstudaga, ekki þarf að panta tíma vilji fólk koma fyrir hádegið, en betra er að hringja á undan sér, vilji maður koma eftir kl. 13.00. Síminn á skrifstofunni er 464 1317

Bára Hermannsdóttir lést á Dvalarheimilinu Hvammi, miðvikudaginn 4. mars.

Útför Aðalsteins Þórólfssonar fer fram laugardaginn 7.mars kl. 11.00 frá Húsavikurkirkju.

Útför Vigfúsar B Jónssonar frá Laxamýri, fer fram frá Húsavíkurkirkju, laugardaginn 7.mars kl. 14.00