Húsavíkurkirkja

Hjörleifur Valsson heldur einleikstónleika í Húsavíkurkirkju laugardaginn 30. ágúst kl. 17. Miðaverð kr. 2000. Hann mun leika á Stradivari fiðlu sem er frá árinu 1732. Á sunnudeginum leikur hann á fiðluna í messu kl. 11. Kirkjukór Húsavíkur syngur undir stjórn Aladár Rácz. Sóknarbörn eru hvött til að fjölmenna á tónleikana og í messuna.

Næsti fermingarárgangur heldur að Kirkjumiðstöðinni að Vestmannsvatn í dag til sólarhringsdvalar í fallegu umhverfi þar sem ýmislegt verður boðið upp á til fræðslu og skemmtunar, m.a. kanóróður á vatninu, göngutúrar og berjatínsla. Fermingarbörn hafa sótt þennan skóla óslitið síðan 2003. Umsjón hafa auk sóknarprests, sr.Þorgrímur Daníelsson og starfsfólk búðanna. Þess er vænst að foreldrar sæki lokasamveruna annað kvöld, 21. ágúst kl. 21.

Magnús Atli Fannarsson var skírður að Hjarðarhóli 14, sunnudaginn 10. ágúst. Foreldrar: Lilja Hrund Másdóttir og Hrafnkell Fannar Magnússon, Auðbrekku 12, Húsavík. Skírnarvottar: Jón Magnús Guðmundsson og Erla Vilborg Hreiðarsdóttir.

Líney Margrét Gunnarsdóttir, Iðavöllum 2 lést 30 júlí. Útför hennar fer fram frá Húsavíkurkirkju föstudaginn 8. ágúst kl. 14.

Mærumessa sem sóknarprestur stóð fyrir í skrúðgarðinum á Húsavík við Kvíabekk Sunnudaginn 27. júlí var vel sótt en 65 gengu til helgra tíða í helgidómi náttúrunnar í blíðum sólfarsvindi. Það er ljóst að þessi messa hefur fest sig í sessi sem liður í hátíðarhöldum Mærudaga. Almennur söngur var við undirleik Sigurðar Hallmarssonar og nið Búðarárinnar sem rann hjá. Messugestir tóku vel undir söng og tóku virkan þátt í víxllestri úr Davíðssálmum. sr. Sighvatur Karlsson leiddi messuna þar sem hann stóð fyrir framan fallegt blómstrandi Gullregn sem skapaði fallega umgjörð um athöfnina.

Aðalheiður Helga Kristjánsdóttir var skírð í Húsavíkurkirkju laugardaginn 26. júlí. Foreldrar hennar eru Guðrún Dís Emilsdóttir og Kristján Þór Magnússon, Njálsgötu 86, Reykjavík. Skírnarvottar: Helga Kristjánsdóttir og Aðalheiður Steingrímsdóttir

Patrekur Nói Hrafnsson var skírður í Húsavíkurkirkju föstudaginn 25. júlí. Foreldrar hans eru Ásta Eir Eymundsdóttir og Hrafn Karlsson, Noregi. Skírnarvottar: Kristján Eymundsson og Steingrímur A. Jónsson.

Guðmundur Ingi Eiðsson var skírður að heimili sínu, Lyngholti 5 miðvikudaginn 23. júlí en fyrst blessaði sóknarprestur nýja heimilið. Foreldrar hans eru Katrín Guðmundsdóttir og Eiður Pétursson. Skírnarvottar: Gunnlaug María Eiðsdóttir og Magnea Ingibjörg Þórarinsdóttir.

Mærumessa verður haldin í skrúðgarðinum við Kvíabekk n.k. sunnudag 27. júlí ef veður leyfir. Undirleikari á harmonikku verður Sigurður Hallmarsson. Þá skal minnt á að kvöldbænir verða í kirkjunni á sunnudagskvöldum kl. 21. til 14. september að 3. ágúst undanskildum. Kvöldbænirnar fara fram á íslensku og ensku og eru í umsjá sóknarprests sem fékk góða aðstoð ferðamannafulltrúa hjá Atvinnuþróunarfélagi Þingeyinga til að hrinda þessu í framkvæmd með víðtækri kynningu. Sóknarbörn eru hvött til að nýta sér kvöldbænirnar og taka með sér erlenda gesti. En kirkjuganga á helgum degi er lífsmáti hjá mörgu fólki hérlendis sem erlendis.

Sólveig Guðrún Jónasdóttir, Holtagerði 3 lést á sjúkrahúsi í Tyrklandi 21. júlí. Útför hennar fer fram frá Húsavíkurkirkju fimmtudaginn 7. ágúst kl. 14.