Húsavíkurkirkja

Helga Björg Pálmadóttir og Brynjúlfur Sigurðsson, Höfðabrekku 13, Húsavík voru gefin saman í hjónaband í Húsavíkurkirkju laugardaginn 5. júlí af Jóni Ármanni Gíslasyni prófasti.

Aðalsteinn Karlsson, Baughóli 25 lést að kvöldi 15. júí á sjúkrahúsi Húsvíkur. Útförin fer fram frá Húsavíkurkirkju fimmtudaginn 24. júlí kl. 14.

Höskuldur Ægir Jónsson var skírður að Uppsalavegi 27 laugardaginn 11. júlí. Foreldrar hans eru Elísa Rún Jónsdóttir og Jón Höskuldsson, Garðarsbraut 43. Skírnarvottar: Ævar Ákason og Irmý Dómhildur Antonsdóttir.

Indriði Indriðason, ættfræðingur, Hvammi, Húsavík lést 4. júlí. Útför hans fer fram frá Fossvogskapellu 17. júlí kl. 11.

Sóknarprestur hefur ákveðið að birta valdar minningarræður á vefsíðu Húsavíkurkirkju, ekki síst vegna geysilega mikils heimildagildis þeirra. Minningarræða Sigurðar Péturs Björnssonar var fyrst til að birtast á vefnum. Nú kemur fyrir sjónir almennings ræða sem flutt var yfir moldum Gertrud Estrid Elise Friðriksson sem gift var Friðriki A Friðrikssyni fyrrv. prófasti sem þjónaði hér á Húsavík frá 1933 til 1964, eftir það um 8 ára skeið í Hálsprestakalli. Á morgun 4. júní eru 83 ár síðan þau gengu í hjónaband. Þess má geta að ræðan er önnur líkræðan sem sóknarprestur samdi en hann var vígður til Húsavíkurprestakalls 5. október 1986. Ræðuna er að finna hér.

Það var hvítalogn á Húsavík á sjómannadaginn 1. júní þegar messað var í kirkjunni. Sóknarprestur fermdi tvíburana, Halldór Geir Heiðarsson og Helgu Björk Heiðarsdóttur en faðir þeirra er sjómaður. Kirkjukór Húsavíkur söng undir stjórn kirkjuorganistans Judit György. Kirkjukórinn söng lagið Sjómannaminning, mjög fallegt lag. Þökk sé þeim sem sóttu messuna sem var hátíðleg og vel flutt af kirkjukórnum. Ræðu sóknarprests er að finna hér.

Guðrún Herborg Ingólfsdóttir, Sólbrekku 10, lést á Fjórðungssjúkrahúsinu á Akureyri 24. maí. Útförin auglýst síðar.

Á Hvítasunnudag sóttu um 370 manns hátíðarmessu í Húsavíkurkirkju þar sem sóknarprestur fermdi 15 börn ásamt vígslubiskupnum á Hólum, Jóni A Baldvinssyni. Nokkrir hafa beðið mig um ræðuna sem er hér að finna. Það var gaman að syngja hátíðarsöngvana í þéttsetinni kirkjunni á þessum fallega degi í lífi fermingarbarnanna og fjölskyldna þeirra

Guðsþjónustan n.k. sunnudag 18. maí kl. 11 verður tekin upp af ríkisútvarpinu og útvarpað sunnudaginn 29. júní kl. 11. Kirkjukór Húsavíkur syngur undir stjórn Judit György. Kórinn mun m.a. syngja sálminn Í bljúgri bæn í sérstakri útsetningu og lagið Ó heilög elska við texta eftir sr. Friðrik A Friðriksson. Í ræðu sinni mun sóknarprestur fjalla um vald Guðs og manna. Sóknarprestur væntir þess að sóknarbörn fjölmenni á sunnudaginn í messuna.

Gospelkór Húsavíkurkirkju hélt vortónleika sína í kirkjunni 9. maí, tvívegis fyrir nánast fullri kirkju. Stjórnandi var Guðni Bragason.Gestasöngvarar. Ína Valgerður Pétursdóttir og Edgar Smári Atlason. Hjálmar Ingimarsson lék á bassa. Jón Gunnar Stefánsson á trommur, Sigurður Illugason á gítar. Snæbjörn Sigurðarson á hammond. Hljóð og tæknimaður var Kristján Halldórsson.

Lesa áfram …